སྒོ་རི་ན་ལྷ་ཁང་།

སྒོ་རི་ན་ལྷ་ཁང་།

 

སྒོ་རི་ན་ཀུན་སྣང་འོད་གསལ་ལྷ་ཁང་གི་ཆགས་རབས་མདོར་བསྡུས།

༉ སངས་རྒྱས་གཉིས་པ་ཨོ་རྒྱན་རིན་པོ་ཆེ་གིས་ཞབས་ཀྱིས་བཅགས་ཏེ་ ས་ རྡོ་ རི་ བྲག་ ག་ར་གནས་སྦེ་ བྱིན་གྱིས་བརླབས་གནངམ་མ་ཚད་ མཐུ་ཆེན་ཆོས་ཀྱི་རྒྱལ་པོ་དཔལ་ཞབས་དྲུང་ངག་དབང་རྣམ་རྒྱལ་མཆོག་གིས་ ས་གནས་མཐའ་དབུས་མེདཔ་ལུ་ དཔལ་ལྡན་འབྲུག་པ་དཀར་བརྒྱུད་པའི་ཆོས་རྒྱུན་སྤེལ་གནང་སྟེ་ མི་མང་བློ་སེམས་དམ་པའི་ཆོས་ལུ་བསྐུལ་གནང་ནུག།  

རྗེ་མཁན་ཁྲི་རབས་༢༥ པ་ ཡོངས་གྲགས་ལུ་སྒོ་རི་རྗེ་ཟེར་ཞུ་མི་ རྗེ་ཤེས་རབ་རྒྱལ་མཚན་མཆོག་གིས་ སྤ་རོ་གཟར་ཆེན་ཁའི་རི་མགོ་ གདན་ས་ཕྱག་བཏབ་གནང་སྟེ་ དགོན་པའི་མཚན་ཡང་ཀུན་སྣང་འོད་གསལ་ཟེར་བཏགས་ནུག་ དེའི་ཤུལ་མ་ རྗེ་ཤེས་རབ་རྒྱལ་མཚན་གྱི་སློབ་མའི་གཙོ་བོ་ ཐུགས་སྤྲུལ་༤ པ་ཞབས་དྲུང་འཇིགས་མེད་ནོར་བུ་མཆོག་གིས་ ལྷ་ཁང་རྒྱ་བསྐྱེད་གནང་ ནང་རྟེན་རྒྱུ་གསེར་དངུལ་ལས་གྲུབ་པའི་སྐུ་གསུང་ཐུགས་རྟེན་དང་ གསེར་ཟངས་ལས་གྲུབ་པའི་རྟེན་གྱི་བཞུགས་ཁང་དང་ རིན་ཐང་ཅན་གྱི་མཆོད་ཆས་མཁོ་སྒྲུབ་གནང་ཡོདཔ་ལས་ དགོན་སྡེ་འདི་ནང་ མངའ་ཐང་དར་ཞིང་རྒྱས་ཏེ་ བླ་མའི་གྲྭཔ་ཚུ་ཡང་ བདེ་སྐྱིད་རྫོགས་ལྡན་གྱི་དཔལ་ལུ་བཀོད་གནང་ནུག།

ཨིན་རུང་བར་སྐབས་ཅིག་ལས་ དགོན་སྡེ་ཉམས་ཆག་ཤོར་ཏེ་འབད་རུང་ སྤྱི་ལོ་༢༠༠༡ ལུ་ རྡོར་སློབ་སྐུ་བགྲེས་ངག་དབང་བསྟན་འཛིན་མཆོག་གིས་འགོ་འདྲེན་མཛད་དེ་ གཞུང་གིས་ དགེ་འདུན་སློབ་གྲྭ་འགོ་དང་པ་གཞི་བཙུགས་གནང་ཞིནམ་ལས་ཚུར་ ད་རིས་ནངས་པ་ དཔལ་ལྡན་འབྲུག་པའི་བསྟན་པ་དར་ཞིང་རྒྱས་ཏེ་ཡོདཔ་ཨིན་པས། 

སྒོ་རི་ན་ཀུན་སྣང་འོད་གསལ་ལྷ་ཁང་གི་སྟེང་ཐོག་ལུ་ རྟེན་གྱི་གཙོ་བོ་སངས་རྒྱས་འོད་དཔག་མེད་ཀྱིས་གཙོས་པའི་ རྟེན་གསུམ་ཁྱད་པར་ཅན་མང་རབས་ཅིག་བཞུགས་ཏེ་ཡོད་པའི་ཁར་ ཞབས་དྲུང་འཇིགས་མེད་ནོར་བུ་ སྐུ་དངོས་སུ་བཞུགས་ཡོདཔ་དང་ཁྱད་པར་མེདཔ་སྦེ་ བཞུགས་ཁྲི་རྐྱབ་སྟེ་ཡོདཔ་མ་ཚད་ གཟིམ་ཅུང་ནང་བཞུགས་གདན་དང་ སྐུ་ཧང་གི་རིམ་པ་བསྒྲིགས་དེ་ཡོད་མི་དེ་གུ་ལས་ བྱིན་རླབས་ཞུ་ཚུགས་པ་ཅིན་ གདོན་བགེགས་ཀྱི་བརླགས་ཁེལ་མི་ཚུགས་པའི་ནུས་མཐུ་ཡོདཔ་མ་ཚད་ ངན་སོང་ལས་གྲོལ་བའི་ཡིད་ཆེས་བསྐྱེདཔ་ཨིན་པས།

 

སྒོ་རི་ན་ཀུན་སྣང་འོད་གསལ་ལྷ་ཁང་དེ་ཝང་ཅང་རྒེད་འོག་ལུ་ཆགས་ཏེ་ཡོདཔ་ཨིན།